السلام عليكم ورحمه الله وبركاته
هاله بنت حلوه للغايه يونس يرعاهاه بعنايه ..
تخرجت هاله من كلية التربيه بامتياز .. وراحت للكلية تستلم الوثيقة بعد ما انطقت شهر تنتظرهم يخلصونها .. اخذت
وثيقتها وراحت لبيتهم والضحكه شاقتن خشتها شق .. لدرجة انها ما تمشي مثل الناس بل صارت تناقز مثل الارنب
اللي كل اهلها كانوا يشبهونها فيه لان هاله كانت ظروسها اللي قدام طوال .. وكان اخوها هاني اذا جا يسأل عنها يقول وين ارنوبه .. ( ولله في خلقه شؤون)
وبعد ما وصلت هاله للصاله استقلبوها اهلها بالاحضان .. باستها امها وقالت لها مبروووك يا بنتي .. وباسها ابوها
وقال مبروك يابنتي .. وباستها أختها وقالت لها مبروك يا اختي ولكن يوم جا اخوها يبوسها طلع لها حبة جزر
وقال لها مبروك يام ظروس ..قالت له : كل تبن ياحقير .. وراحت لغرفتها زعلانه .. بينما كمل الاهل احتفالهم واكلوا
عنها الكيكه وفقعوا البلونات .. الام مسكت التلفون ودقت على اختها وقالت لها : شفتي يا منيرة بنتي تخرجت
بامتياز وبتصير مدرسه كبر قريح .. قالت اختها طيب بتزوجينها .. قالت الام لا والله ابوها يقول مناب مزوجينها الين
نكمل اقساط السياره .. ثمن تطس .. طيب كم باقي على سيارتكم وتخلص اقساطها .. باقي الله يسلمتس 5 سنين .
. ايه الله يوفقها ..
وفي زاوية اخرى من المنزل كان الابو مبارك جالس ومعه آله حاسبه يحسب راتب بنته والدفعات اللي بيسددها من راتب البنت .. <<< هذا اللي يقول يبدّي العصابه قبل الفلقه ..
وكانت هاله قابعه في غرفتها ومعها ورقه وقلم تكتب فيها الاشياء اللي تبي تشتريها من اول راتب يبي يطلع
لها بعد الوظيفه .. وكانت الورقه تحتوي على ( شراب أسود .. كندره سودا .. علك نعناع .. كحل سايل .. خاتم اكسسوار .. غطوه .. بكله من ابو ريالين .. قلم حبر ناشف احمر وازرق .. فصفص )
كانت هاله في غاية الفرح والسعاده .. لدرجة انها مازلت تطامر حتى وهي جالسه على السرير .. حتى ان سريرها قام عليها وقال لها بتركيدن يا هالوووه والا ترى بهبد بتس على الارض يالمعوقه ..
نامت هاله على دفترها ابو عشرين ورقه واخذت تحلم بفارس احلامها (عنبر) ولد جيرانهم ..
الصباح الساعه 8:02am
مبارك : يالله صباح خير اشوف الجريده ياهاني .. سم يبه .. اخذ الابو الجريد وفتح على صفحة الرياضيه عشان
يتابع أخبار نادي .. وبعد ما خلص فتح على الصفحه الاخيره يقرا كاريكاتير الهليل .. هههههههههههه الله يقطع
شيطانه ذا المخيس .. ام هاني : ابو هاني يقولون ان التعيين طلع اليوم ماودك تشوف بنتنا هاله وين تعينت فيه .. ؟ الله يذكرتس الشهاده ..
قام الابو يقلب الصفحات واخذ
الدربيل وركزه على الجريده وقام يدور على اسم بنته ..
لقيتها لقيتها .. قطت الام معه وقالت : وينها .. هذي هي ناظري ام ظروس هذا اسمها ( هاله مبارك
مسطّرالعربجاني - تخصص احياء دقيقه - تم التعيين في محافظة المنقاطيه ) بعد ما قروا مكان التعيين تفل الاب
على الجريده ونطلها وهو ضايقن صدره .. قالت الام : وش بلاك يابو هاني وراك زعلان .. .. مهيب مشكله يا ابو
هاني البعد بعد القلوب . . كلي تبن انتي الثانيه .. الحين البنت يبي لها باص يوديها ويجيبها يعني يبي لها حول
الالفين ريال .. يعني القسط بينقص ولا زم اكمله انا .. ايييييييييه والا موب قصدك ان بنتنا بتقطع مسافة طويله ..
مالت عليك بلا مالت .. اهوف بس الفنجال خن اتقهوى ابرك لي .. زعل الابو من كلام ام هاني ونطل عليها الفنجال
ولقط شماغه وطلع .. نزلت هاله من فوق وجت تسلم على امها .. ناظرت امها لها باستغراب وقالت : وش ذا اللي
بوجهتس يا هاله وش انتي مشخبطه .. هاله : ايه يمه هذا من دفتر هاني نمت عليه وانامدري .. المهم يمه ماتدرين
وين عينوني فيه .. الا يا بنتي عينوتس في قلعة وادرين .. طيب يمه ذا القلعه جديده والا قديمه .. هاله ! صدقتي هذا
وانتي بتصيرين مدرسه الله يخلف على البنات اللي بتدرسينهم بس .. عينوتس في المنـ والله مدري وش اسمها بس
انها ديرتن بعيده .. صدز يمه
اي والله يا بنيتي .. ضاق صدر هاله لانها بتفارق عنبر( عنبر ولد جيرانهم اللي بينها وبينه قصه حــــب طويله) ..
وماعاد بها شايفته كل صبحيه مع الدريشه .. ولكن هاله قالت انها لازم تتحمل عذاب الفراق والبعد .. وتروح للديره
اللي مدري وش اسمها وتكافح عشان تجمع المهر مع عنبر همن تهربه له في كيس الزباله لاوصلت لبيتهم ..
بعد لحظات .. دخل الاب مبارك فاقن خشته وهو يناظر هاله ويقول لها مبروك يا بنتي التعيين .. عاد شوفي يا
بنتي كل شي قضاء وقدر وانتي قدرتس انتس تروحين لذيك الديره تدرسين بناتهم وانتي عارفه كثرة المشاوير
مهيب زينه .. فانا من رايي انتس تاخذين لتس فيذاك شقه مفروشه وتقعدين فيها وكل شهر تجيننا مره .. وش
رايتس .. يبه مره في الشهر قليله مره انا ما اقدر افارق امي بصراحه .. اقول اسمعي عاد ام ظروس انا قلت تسكنين
فيذاك يعني تسكنين فيذاك .. فاهمه .. ردت هاله بكل انكسار وخضوع .. حاضر يبه ( وجه خانقته العبره ) بينماالاب
بياع الخرفان فاقن خشته وهو يقول في نفسه ايه تسذا زين ..
,,,,,,,,,,,,,,,,,,,,,,,,,,,,,,
استسلمت هاله للامر الواقع وضفّت خلاقينها وقعدت عن الباب تحتري باص ابو دغيمان لنقل المعلمات .. ودعت امها
بحرقه وودعت دجاجها اللي ابوها قال لها انه بيذبحهم عشان ما يجيهم انفلونز الطيور .. وكانت الساعه تشير الى
الرابعه فجرا .. طيييط طيييط .. فجأه تسمع صوت رجال ينادي بمقرفون ويقول هاله العربجاني .. هاله العربجاني
اطلعي من بيتكم .. خافت هاله وراحت تركض لابوها وتقول : يبه يبه مداهمه .. وش مداهمته يالمهبوله هذا سواق
الباص يبتس تطلعين ..فتح الابو الباب ومسك هاله ووجهها للباب ورجفها لينها رادعه في باب الباص .. فتح ابو
دغيمان الشباك وقال لابوها : لعنتن تشيلك ياحيوان بشويش على باصي يالهيس .. وفحط ذيك الفحطه اللي خلت كل
البنات اللي بالباص يتمجمعون ورى تسنهم خرفان جايبهم للمقصب ..
مشى الباص وبدو المعلمات يتعرفون على بعض وطبعا ابو دغيمان كان قاط اذنه معهم .. التفتت هاله على اللي
جنبها وقالت لها وش اسمتس .. ردت ذيك : ليه بتناسبيني ..وفرّت خشتها للجهه الثانيه .. وم قمطت هاله وحلفت انها
معد تسأل احد عن اسمه .. بعد ساعتين حس ابو دغيمان ان المدرسات جاهم النوم عاد هو من اللعانه قال ياسلام
ليش هم ينامون وانا لا . . ويقوم ويدعس ذاك الشريط ( مع السلامه اتعب القلب فرقاك . . مع السلامه رح وانا غصب
ابكيك ..الخ ) ماقدرت هاله تتماسك نفسها وبدت تصيح وتناشق .. الين وقفوا عن محطه .. واخذ ابو دغيمان
المقرفون وقال: يله يا بنات اللي تبي تشتري شي من البقاله والا تبي تزغل والا تبي تطلّق رجلينها تحوّل بس ترى
لكم 5 دقايق .. واللي بتتأخر ترى بمشي عنها .. فاهمين ..
دحدروا المدرسات وكلا راح يقضي حاجته .. راحت هاله للحمامات .. تبي تزغل ولكن للاسف كل الحمامات نظيفه مره
وحاطين فيها معطرات جو .. شي لونه بني يابس وشي لونه اصفر سايل دورت هاله حمام بدون معطر ولكن
للاسف .. فقررت انها تزعل في البراحه اللي جنب المحطه .. نادت ابلا عبير وابلا سوسن وخلتهم يفتحون عباياتهم
وهي تقعد بوسطهم وبعدين شسمه .. المهم خلصت هاله من المهمه وركبوا في الباص ..و كملوا الطريق ..
صارت الساعه 7 الصباح نزلهم ابو دغيمان عند خيمه عندها وحده بدويه لابسه نص برقع تقول : ارحبواا ارحبوا يا
بنات .. نزلوا الابلات وسلموا عليها وقالت لهم : هذي( مدرسه بنت الرجال) الثانويه .. وهذولا الطالبات .. وتأشر على
بنات شعورهم حمر وفي يدينهم حنا وغوايش وجالسين على الارض .. وقالت المديره يله ادخلوا عليهم ودرسوهم ..
استغربت هاله من الوضع المزري للمدرسه .. وش ذي مدرسه والا مسلسل بدوي .. الحين كرف 21سنه وهذي
آخرتها .. ايييه الله يخلف علي بس ..
شوي الا وتسمع هاله صوت ابلا موضي تتهاوش مع ابلا حنان كل وحده تبي تشرح اول .. ابلا موضي تقول : انا
بشرح اول يا خنزيره .. ابلا حنان : كلي تبن يا حقيره .. ابلا موضي : اناحقيره يالصايعه .. نسيتي يوم تركبين مع
راعي السيكل وتروحون للخرابه انتي واياه .. ابلا حنان : انطمي ياالداشره .. انتي اللي نسيتي الظاهر .. نسيتي
يوم تخلين سواق الباص يودينا كلنا للبيت وانتي خلاتس آخر وحده على بالتس ما درينا عنتس يأم الرجاجيل .. قربت
ابلا موضي ومعطت شوشة ابلا حنان قامت ابلا حنان وقبصت ابلا موضي .. وتجي ابلا هيفا تبي تفك بينهم مير
وينكسر ظفرها اللي حاطتن فيه مناكير احمر .. ويقعدون الثنتين يتلاعنون ويتدابجون والبدويه ام برقع تناظرهم
وتقول : يا وجه الله ذولا مدرسات ذولا .. وتقرب منهم وتمسكهم كششهم وتجرهم كما تجر البقره لحضيرتها .. وقالت
لهم هين يالملعونات انا برفع فيكم تقرير للوزاره .. المهم اخذتهم وراحت .. مدري وين ..
وكملو باقي المدرسات شرحهم .. وبعد ما خلصت هاله من الشرح راحت لام برقع عشان تسألها عن الشقق اللي عندهم ,,
هاله : مساء الخير .. ام برقع : اقلطي .. حياتس .. هاله : اقول يا .. ام برقع : ام شرخ .. هاله : اقول ياام شرخ
ماتخبرين لي فيذا شقه قريبه للايجار .. ام برقع : شقه .. وشو شقه يا بنتي حنا هنا ما عندنا مباني .. ما عندنا الا
شوفة عينتس هالخيام .. تبين تاخذين لتس خيمه .. شوفي ابو مطلق يأجر على المدرسات خيام .. روحي له وخذي
من عنده خيمه انتي وحدا زميلاتس ..
حست هاله بالاحباط الشديد .. ولكن على طول طلعت لها صورة عنبر وقالت خلاص انا لازم اتحمل لعيون عنبر ..
راحت هاله لابو مطلق واخذت من عنده خيمه هي وابلا هيفاء .. فرشوا مراقدهم على الارض ولكن ما قدروا ينامون
من ذا القعران اللي يدبي بالارض .. ولكنهم سلموا الامر لله وناموا ..
والله ماكان الفراق اختياري ! رووووعه ! 
العرض العادي
