 ريال مدريد واختباراتي..mozmoz
السلام عليكم
أبقوولكم سالفة <<بس مابهاا غباار ماسحتهاا
مع قرب الامتحانات بديت اسوي جدول مناسب للمذاكرة لأول مرة بحياتي
((فاصل))
تدرون ليه سويت جدول
عشاني في آخر سنة في الثانوية العامة
وتعرفون إن الطلاب والطالبات يجتهدون عشان يجيبون مجموع ممتاز ونسبة عالية ويحققون أمانيهمـ. << اهم شي الاماني
((عدنا ))
وأنا أرتب أوراقي حقت المذاكرة.أدور الورقة اللي ببدأ فيها بس مالقيتها!!؟؟
يمكن تكون مع صديقتي!!لامستحيل لأني أنا اللي آخذ منها الأوراق عشان أكملها بحكمـ غيابي الكثير.
أجل وين راحت,يمكن تكون بملف الأوراق حق الثانوية كلها.
((فاصل))
اجمع أوراق مرحلة الثانوية عشان اتخلص منها مرة وحدة.وانسى المدرسة
(( عدنا))
المهمـ فتحت الملف ولقيت الورقة,ويومـ أخذتها طاحت ورقة ثانية,يومـ شفت الورقة لقيتها جدولي حق ثاني ثانوي للفصل الدراسي الثاني.
وماأحلى الأيامـ في امتحانات العامـ وخصوصاً آخر يومين.
تدرون ليه؟؟
أنا أقولكمـ:
العامـ احنا خلصنا يومـ الاثنين بتاريخ 3\6\1428.وكان علينا مادة سهلة
أنا مايهمني آخر يومـ أنا يهمني اليومـ اللي قبله يومـ الأحد يومـ الانجليزي يومـ الارتباكـ والخوف.
يومـ الأحد صحيت من النومـ في الصباح عشان أروح للمدرسة,بس بالي مرة مشغول بس مو في الامتحان كان بريال مدريد
يومـ الأحد اليومـ اللي قبل الأخير من الاختبارات كانت فيه مباراة ريال مدريد الأخيرة في الدوري العامـ اللي كانت ضد مايوركا.
وتعرفون إن الدوري العامـ كان حماسي للأخير.يعني لو خسر ريال مدريد راح يخرب علي عطلتي من بدياتها
المهمـ,نزلت تحت عشان أفطر كالعادة,بس هالمرة ماأكلت مثل الأيامـ اللي راحت كان مبين عليّ إني افكر بشيء.
وأمي تناظر فيني وحست وتقولي:
الله يسهل عليكـ امتحان اليومـ.
بغيت أرد عليها وأقولها إن بالي مشغول بمباراة ريال مدريد.بس لو أقولها أخاف تدعي عليهمـ
بعدها رحنا للمدرسة وأنا افكر ياترى كيف بناظر المباراة أبوي مسكر التلفزيون عني.
ولو أقوله بيعصب عليّ وبيزعل.
طيب وش اسوي,أحسن شيء إني اراجع الأنجليزي وفيه وقت للحل.
دخلت قاعة الامتحان,وجلست صديقتي,وجلسنا نراجع الأنجليزي وكذا.
بعدين قالت:يالله يامزون ماأبغى بكرا يجي.
قلت:حتى أنا.
-والله مابي افارق صديقاتي والمدرسة.
-وأنا بعد ماودي يجي لين ألقى حل لليومـ.
-وش تفكرين فيه؟
-افكر في ريال مدريد.
-مالت,الناس يزعلون عشان المفارق,وأنتي ريال مدريد.
-وش اسوي مباراة اليومـ مهمة,آخر مباراة,وإذا انهزموا راح علينا الدوري.ودي لو الاتحاد الاسباني أجّل اللقاء لبكرا,عشان اقدر اناظرها.
-مادريتي,أجلوها عشانكـ.
ضحكنا بعد اللي قالته,وبعدين دخلت الاستاذة توزع أوراق امتحان الأنجليزي
اذكر إن الامتحان كان سهل بالمرة<<عشان الاستاذة الله يحفظها حددت معنا
ويومـ خلصت الحل قعدت افكر بريال مدريد<<ماعندها وقت.
ياربي وش اسوي اليومـ.أو بالأحرى همـ وش بيسوون,ياترى بيفوزون ولالا؟
أكيد بيفوزون ذولا ريال مدريد ماينخاف عليهمـ.ماينخاف عليهمـ وهمـ منهزمين من الصغار.
لو ننهزمـ,راح ياخذ الدوري برشلونة.وإذا أخذ البرسا الدوري ماني جايه بكرا للمدرسه عشان الليغا راحت.
لاوش اعيد سنة عشان امتحان سهل.
ياربي وش اسوي.مافيه إلا إني ابكي,ايه ابكي وإذا قالوا ليه أقول عشان فرقاكمـ.
بس فرقاهمـ اجلس ابكي من البيت.طيب وش فيها لو أقولهمـ إني ابكي عشان الريال يدرون إني احبهمـ.
الحين أنا ليه متشائمه فيهمـ كذا,لا إن شاء الله الريال قدها وبيفوز
طيب الحين وشلون اذاكر امتحان بكرهـ وأنا من الأن افكر فيهمـ,ليتني مذاكرته قبل.
وقعي لو سمحتي. >>هذا صوت الاستاذة قطعت حبل افكاري
المهمـ
طلعت من القاعة وشفت صدقاتي ويالله تبدأ الاسئلة
كيف الامتحان,وشو جواب ذا وذاكـ وهذاكـ......إلخ
قلتلهمـ إني حليت زين بس مااذكر الأجوبة
ويومـ رحت للبيت نمت عشان اصحى العصر واذاكر.
عاد تدرون اني حلمت في ريال مدريد
بس مااذكر الحلمـ
المهمـ صحيت العصر,رحت للمطبخ عشان اصلح لي نسكافيهـ عشان اعرف اذاكر.
وأنا بروح لغرفتي طلعت أمي قدامي.
قلتلها:ادعي ياأمي ادعي.
قالت:الله يوفقكـ يابنتي,ويسهل عليكـ امتحان بكرا.
-مو لي
-أجل؟؟!!
-لريال مدريد اليومـ بيلعبون وإذا خسروا راحت علينا الليغا.
-الله يخلف عليكـ هذا وقت ريال مدريد ماأقول إلا الحمدلله والشكر بس.
دخلت غرفتي وكان جوالي بجنبي قعدت اطالع فيه.واقلبه يمين يسار,تذكرت إني مشتركة بجوال الزعيمـ(جوال نادي الهلال)
>>مو معناته إني مشتركه فيهمـ عشاني احبهمـ,لا أنا اشكرت فيهمـ عشان ماعرف رقم جوال نادي غيرهـ
الموووهمـ
قلت اكيد بيرسلون لي النتيجة هذي عادتهمـ,ببدأ أذاكر وانساهمـ
طبعاً ذاكرت بس للأسف همـ كانوا في تفكيري
وبعد ماخلصت المذاكرة قمت اشوف الساعة لقيت إنه باقي وقت كثير على المباراة<<من زود الشطارة
قلت لو اطلع من الغرفة قالوا لي ذاكري ذاكري ذاكري وأنا ذاكرت
طيب وش اسوي,احسن شيء اقعد على جهازي واتونس فيه شوي.
قعدت عليه وتمنيت إن النت مفتوح بس ابوي كان فاصله عن جهازي بحكمـ الامتحانات.
آآآآخ لو النت مفتوح كان اقدر اناظر المباراة لو كتابياً
المهمـ قعدت ألعب سويليتير العنكبوت وخواتها,ومشغله الأغاني<<تحسون انها مو في الامتحانات
وبعد ماطفشت شفت الساعة لقيت إن المباراة بادية لها ربع ساعة
بديت ارتبكـ وتلخبطت ماادري وش اسوي,افتح الكتاب بعدين اسكره,أروح على الجهاز بعدين اهون,والله مدري وش اسوي
<<هذي ربع بس أجل لو مخلصة وش بيصير فيني
المووهمـ
هديت شوي وقلت اسوي صورتين لريال مدريد عشان احطها بكرا في ماسنجري
وحده للفوز والثانية للخسارة.
ويومـ صلحت الصور وقمت ارتب شنطتي لبكرا.
إلا جوالي رن يعلمني إن فيه رساله جديدة,
خفت في هذيكـ الساعة لأن المرسل الزعيمـ يعلمني نتيجة الشوط الأول.
خفت افتح الرسالة لأني كنت خايفة من نتيجة المباراة
قلت افتح,لا,ايه,لا,ايه,لا....إلخ
في النهاية قررت افتح الرسالة ويصير مايصير.
ويومـ فتحته الرساله ليتني مافتحه
كانت النتيجة 1\0 لمايوركا,والبرسا اتوقع انه متعادل
يعني لو استمرت النتيجة كذا راحت الليغا علينا
والله دمعت عيوني من أول ماشفت الواحد
وبعدها قعدت ابكي وااااااااااااااااااااء
واقول راح الدوري علينا
ياربي وش اسوي مابي اروح بكرا وانا راسي نازل ابيه مرفوع.
يارب خل ريال مدريد يفوزون يااااااااااااااارب
والله ساعة إلا ربع وأنا أبكي وادعي,ابكي وادعي.
ويومـ خلصت المباراة طبعاً الزعيمـ ارسلي نتيجة المباراة.
المهمـ قلت ماني فاتحتها ألقاهمـ الحين منهزمين كيف بنامـ واروح بكرا.
مابي اروح بكرا وعيوني حمراء من الصياح.
أحسن شيء إني ابكي الحين قبل ماافتحها.
وأحاول ابكي بس ماقدرت
قلت بفتحها وبكيفي ابكي بكرا.
وانا افتح الرسالة عيوني مغمضة من الخوف
المهمـ فتحت عيوني ولقيت مكتوب:
الريال بطلاً لليغا الاسبانية بعد فوزهـ على مايوركا بـ3\1.
معقولة الريال بطل لالا,إلا ليه مو هو النادي الملكي
يابعدي انتمـ والله فديتكمـ أنا
ألف الحمدلله ياارب انكـ استجبت دعائي,الحمدلله يارب
وجلست ابكي<<بكاء الفرح هالمرة
وفي الصباح صحيت أول وحدة<<من الفرحة
ورحت للمدرسة ودخلت القاعة لقيت صديقتي قلتلها:
-باركيلي.
قالت:مبروكـ
-فازوا والله فازوا
-زين الحمدلله,مبروكـ ألف مبروكـ يستاهلون
-الله يباركـ فيكـ عقبالكـ,اساساً كنت عارفة إنهمـ يفوزون.
-ايه واضح من أمس.
وبعد ان ماخلصت من الامتحان وطلعت من القاعة,رحت اسلمـ على صديقاتي.عشانه آخر يومـ
وكان كل وحدهـ تطلب مني ذكريات,وطبعاً مارديتهمـ وكتبتلهمـ:
(ذكريات مزون في الفرحة اللانهائية بالليغا الاسبانية)
صحيح أني زعلت على فراقهمـ,بس الفوز انساني شوي.
وأول مارجعت للبيت شبكت النت وجلست اجمع كل الصور حقت الفوز,ويومـ صحيت العصر جلست احمل المقاطع حقت الفوز والفرح
ذكريات جملية ماراح تنسى أبداً
اتمنى إنها تنعاد بس ماابغاها السنة هذي عارفين السبب مايحتاج
والله الله بالمذااكرهـ يااابنااات
نبي نسب حلوهـ __________________ ¤°^°¤§][][مــــــــmozmozـــــــزون][[§¤°^°§[  قالوا : البيت الحرام .. قلت : ارضي
قالوا : الشرع الامام .. قلت : ارضي
قالوا : الحب السلام .. قلت : ارضي
قالوا : في مدحك نزود .. قلت : يفداها الحسود
ما على هالارض .. ارض مثل أرضي 
التعديل الأخير تم بواسطة : مـــmozmozـــزون بتاريخ 05-01-2008 الساعة 05:35 AM. | 
و 
و 
العرض العادي
