admin

يقول واحد من الشباب (( طبعاً يتخيل المسيكين )) :


ليلة الدخله دايم دايم دايم ها الموضوع افكر فيه
مشغلني ذابحني قاهرني ليل نهار ونهار وليل وعصر ومغرب وفجر وانصاص الليالي
وااااااه من انصاص الليالي
ليلة الدخلة وش بسوي في ليلة الدخلة ؟
وكيف بتصرف ؟
وشلون بتكلم ؟
ووش بقول ان تكلمت ؟
ووشلون بيصيرررر ؟
اسئلة كثيرة ومعقدة افنيت سنين من عمري افكر فيها وابحث وادور عن اجوبة لها
وسألت اهل الخبرة بس لين اللحين ما عرفت شي
خلوني اقولكم وش قصدي من القصة
طبعاً العلم عند الله بس هذي بعض تخيلاتي وتصوراتي للي بيصير لي لليلة دخلتي
خطبت وبعدها تملكت حلو
وجا يوم العرس وتسبحت ( سباحة استثنائية باالعادة بس في الاعياد )
وفركت جسمي با الليفة وفرشت سنوني ونعمت وكديت قذلتي وحددت شنبي
وقصصت اظافري ( علشان ما امخش البنت )
ولبست الملابس الداخليه
وبعدها طقيت لك ثوب العرس الكشخة ولا ارضا بأقل من ثوب الدفة طبعاً عريس
وبعدها صكيت القلابي وبيحمر وجهي كاالعادة
ولبست الطاقية الزري ( وععع) وفوقها شماغ العقل ابو خمسطعش وفوقة عقال متنتف
وأخيراً لبست آخر قطعة وهي البشت
واكيد اني متسلفة من واحد من الربع
اما بفصل واحد بذاك المبلغ علشان ليلة معصي
وبتجي اختي الكبيرة الله يطول لي بعمرها ( قولو آمين )
وتبخرني وتصبصب علي من انواع الاطياب
وبتقول " ما شاء الله عليك حارسً يحرسك يا خوي كلك ملح وقملة اقصد قبلة
وبتجي جدتي وبعد ما تتبكبك شوي ( الفلم الهندي زي العادة )
بتقول هي بعد " ولااااااااك يخزي العين شو ما احلااااااااك يا بيزاا " ( حشى وراها قلبت لبنانية ؟)
لا بتقول " مبروك يا يابعد عمري والله عشت وشفتك عريس عقبال ما اشوف عيالك عرسان)
وطبعاً بيتخلل كلماتها هذي دموع ومشاهق ووقفات لمسح الدموع با الشيلة ثم المتابعة
وبينقصنا صوت ربابة علشان يكمل المسلسل يعني شغلة
المهم تبخرت وركبت في سيارة اخوي ( كراسيدا 95 جي ال) اكشخ موتر عندنا
طبعاً بركب ورا وابوي بيركب قدام ولو ابو العريس
وادهرت الصوالين تحمل باقي الحريم وما يحتاج طبعا صياح البزارين ولجتهم
هذا بيركب قدام
وهذا يبي يجلس عند الدريشة
وذوليك قالبين المرتبة الاخيرة فرع لملاهي الحكير
وانواع الصياح
وذيك تجلد في البزر علشان يوقف عن الصياح ( هذي اللي لين اللحين ما فهمتها عجبي ) !
سرت القافلة او الموكب وبدو طبعا المخابيل يضربون بواري بسياراتهم ( ددسن 85 وهايلوكس 88)
وعلى بالهم يسون لي زفة وفضحونا بسياراتهم ( من زين السيارة اللي عاد انا راكبً فيها )
والربع يحسبون لا صرت في موكب عرس
يحقلك تقطع الاشارات وتعكس في الشوارع وتسب وتلعن في اللي ما يفتح لك الخط
انا اصلاً من شفت ضرسه اللي في الواجهة طايح ويقولي توة لبان وانا غاسلً رجلي منة
وصلنا للقصر
واكيد انة بيكون في جنوب جدة لاني طفران وماني قد قصور الافراح اللي بشمال جدة
بيعرض اخوي بسيارتة عند المدخل
وبيجون يركضون اخوان العروس يفتحون لي الباب ( هين كلها شهرين ويتوطون في بطني )
بنزل وبسمع الخنبقة المعهودة " مبروك مبروك منك المال ومنها العيال "
بيجي ابو العروس يسلم على ابوي ثم علي وبيجيون اثنين شايلين مداخن البخور ويبخروني بالبخور
واكيد طرف شماغي بيدخل داخل المبخرة وبيحترق زي العادة
ومع ها الاجواء الحلوة والريحة الزينة بيهجمون علي الناس ويحبحبوني وبلقى
انواع السعابيل على خدودي عقبهم
والعقال بيطيح اكثر من مرة وطرف بشتي بيوطونة لين يقلب لونة وكل هذا عادي ومستعد له
عقبها بيمسكني ابو العروس مع يدي تقل اني اعمى ماشوف دربي
وبياخذني الى الصالة وبيجلسني على البيست ( طلع ديسكو مهوب قصر افراح) ههههههههه
بيدهرون العيال باالقهوة
والواحد منهم لاجا بيصب لي الفنجال بيقعد ينتفض ويرجف من الرهبة >>>ولو هو جالس يصب للعريس !
بيغثوني قهوة وشاهي
ومتأكد انه بينكب فنجال قهوة على ثوبي من واحد من ها الورعان لابارك الله فيهم اللي يصبون عادي حصل خير
وعقبها كل شوي جايني واحد يسلم ويحبب فيني
وابو العروس بيسوي فيها فاهم وبيقولي هذا فلان وهذا علان موش مشكله بمشيها له
بعدها بيجي رفيق الدرب اللي من الابتدائي انا وياه تقولون لزقة جنسون ( ذيك اللي يحطونها العجايز في ظهورهم )
وباقي العيال يستهبلون علي عند ابو زوجتي
ويتطنزون علي ويعلقون على شكلي ويضحكون ويستخفون دمهم بس برضو بعديها لهم
في اللحظات هذي اخوي بيكون في مطعم البيك يشتري لي ولزوجتي عشاء
وغالب الظن بيكون بروست حراااااااق وخلافة ولايهون عصير ابو طبقات
وبعدين بياخذ العشاء ويودية لشقتي ويحطة في المطبخ بعد ما يغطية بقماش
في القصر بيقوم ابو العروس ويرفع راسة وكرشتة ويرفع شماغة ويقول بصوت عالي للضيوف
" ياالله تفضلو يا جماعة على قل الكلافة العشاء جاهز
وهذي والله الساعة المباركة اللي خلتنا نشوف وجيهكم الطيبة
بيقوم ابوي ويروح عني بعد ما يسلم علي
وبيجي ابو زوجتي وبيوشوش في اذني وبيمسكني مع يدي مرة ثانية ( صار يمون بقوة )
وبياخذني غالباً مع الباب الخلفي للقصر
علشان نوصل للغرفة اللي عروستي بتكون جالسة فيها ( سندريلا على غفلة )
طبعاً بتجيني ام الركب وبا اتنافض وبحس بدوار البحر ( ايه لاني في جدة جنب البحر )
وحرارتي بترتفع والعرق بيبدا يصبصب
وصلنا للغرفة وفتح الباب بعد ان يقول العبارة اللطيفة " افتح ياسمسم "
بينفتح الباب وبيدخل وبيجرني معة ووجهي بيكون لونة ازرق + احمر
واتصور انة بيطلع في وجهي لون جديد بس مدري وشو باالضبط
بدخل وبلقى عروستي واقفة ولابسة الثوب الابيض والشرعة على الراس وماسكة باقة ورد بيدها
واكيد انها بتكون منزلة راسها " طبعاً هذي اول مرة اشوفها "
واكيد انها بتعجبني طبعاً " بنت " هههههههه
المهم جنب المخلوق الرقيق اللي هي عروستي بتكون فية وحدة واقفة جنبها من فصيلة الثديات مكرشة
بس كنها شرانية وبتناظرني بقرف
وودها تذبحني ليش ما ادري هذي هي حماتي ام زوجتي
بجي مدرعم وبسلم وبعدين بروح لحماتي واحب راسها والله يعيني على ريحة الحنة اللي براسها
بجي عقبها اسلم على زوجتي وبتلخبص مدري ابوسها والا لا ؟
اخاف اني ابوسها ويجلدني ابوها
بس الظن ماني معطيها بووووسة البوسة بعدين بعدين خخخخخخخخخخ
بيطلعون امها وابوها بعد ما تقعد تقرقر امها با الكلام اللي مال امة داعي وهو
" حط بنتي في عيونك "
والا خذ هذي " ترا بنتي هذي اغلى ما عندي وابيك تحطها بين عيونك "
وهي عندها غير ذا البنت خمس وكل ما اعرست وحدة قالت نفس الكلام !
المهم طلعو وصرنا لحالنا انا وزوجتي
وبتمر الثواني كنها ايام علينا وحنا ساكتين
هي تعفط في ثوبها وتكسر اصابعها
وانا ماغير اغير شخصية الشماغ مرة احطة فوووق ومرة ارجعة ورا
وفي الاخير الظاهر بصك اللطمة
بيدخل ابوها علينا ويقول
ياالله بتروحون لبيتكم والا بترقدون هنا وهو يضحك ( على بالة ينكت عادل امام على غفلة )
اكيد بضحك وبقهقة مسموعة مجاملة لة هو وكرشتة اللي تقلولون كيس شعير
وبقوم انا وهي وبتلبس عباتها وبنطلع لسيارتي
واكيد بتكون الكريسدا بتاعة اخوي
يمديه رجع من المطعم ولبق سيارتة في الكراج وخلا مفتاحها عليها شغلت السيارة وجت بتركب زوجتي وبتجلس ساعة هي وثوبها المنتفش ووردها اللي معها
وباالاخير بينصك بابها وبدق الريوس واطلع من القصر
متأكد في اللحظة هذي اخوي وباقي العيال بيكونون في سياراتهم
وبيلحقوني على بالهم بيهبلون بي ويبهذلوني !
وبيوقفون جنبي عند الاشارة والله من زين الاشكال اللي يطالع ويضحك علي
و اخوي بيزيد على صوت المسجل وبيرقص سامري على بالة فرقة متحركة
بس بعطيهم اشكل وبيروحون في حالهم
عاد حنا مازال الصمت مخيم علينا في السيارة
سوى صوت بعيد باالعافية يسمع خارج من سماعات السيارة
وكان صوت بشير شنان يغني وصوت المراويس وفلة الحجاج
والعالم الله اخوي نسى يطلع الشريط لانة مجنون بشير
بسوي فيها عاقل وبصك المسجل وبلتفت على المدام لعل وعسى يبدا الكلام بيننا
طبعاً ماراح اشوف شي غير السواد وبقول مو مشكلة في البيت نسولف على راحتنا
وصلنا البيت وفتحت باب الشقة وولعت اللمبات وقلت لها تفضل يا عروسة نورتي بيتك ( اسلوب صح )
وبتدخل بحياء ممزوج بدلع على شوية شطة ( صارت شاورما ماهي آدمية )
فصخت العباة ووقفنا في الصالة وريحة العشاء فايحة في كل مكان
وخصوص الثوم مع اني بكون محرص على اخوي قلهم بدون ثوم بس ياالله بقوم افرجها على الشقة
مع العلم انها قد جتها قبل يوم انها تجيب ملابسها وعفشها
وكاالعادة بكون مسوي جرد على كل شي جابتة عقب ما يطلعون من الشقة خخخخخخخخخ
بعد الفرجة بتميلح اثناء الفرجة واحط تعليقات مضحكة محاولً استخفاف ثقل دمي
رجعنا للصالة وقعدنا فيها واقفين !
ياربي وش نسوي اللحين ؟
بقول اوووة العشاء نسينا العشاء ههههه وبضحك كذا هههههه ( يا شيني )
بروح للمطبخ اجهز العشاء وفي اللحظة هذي بتتكلم اخيراً وبتقول آاااا لا لا استرح انا اجهز العشاء
بكل تأكيد كل صواميلي بتنحل بعد كلامها ذا باتنح شوي وبقول لا والله ما تروحين الليلة ليلتي
وبسوي كل شي بنفسي انتي عروس ما تسوين شي انتي بس تآمرين ( آاااة يا مصلحجي لك غرض )
وجيك متجهه المطبخ وبكون لين اللحين ما فصخت بشتي من زود الثوارة وقلة الدبرة
تعشينا وكني اشوف شكلي وانا اتعشى مسوي نفسي فاهم وآكل با الشوكة والسكين وانواع الحوسة والخبال
وكل ما جيت امسك شي با الشوكة طارت من صحني واستقرت على فستانها
وكني اسمع صوت الاكل اللي بيطلع من فمي وانا آكل الحمبص
وبيبقى شوي حمبص على اطراف فمي زي العادة وزين انه ما وصل خشمي شي بعد
وهي بتآكل اكل نمل ابد بتقعد تقطع من ذا الخبز وتاكلة من زود الحياء ( او يمكن بتحوم كبدها من طريقة اكلي )
وجا وقت العصير وبشرب ابوة كلة وبقعد اتفنن بشرب آخر قطرة في الكاس با الشفاط
وبتطلع ذيك الاصوات المزعجة ( جغغغ غررر جغغغ)
الحمد لله عاد العشاء وخلصنا ولميته
وماعد اشوف قدام عيوني غير سيجارة طالعة من بكت مالبورو ابيض تناديني تعال تعال يا شاطر
بس المشكلة لا البنت ولا اهلها يدرون اني ادخن اكيد بكون كاذبً عليهم وقايل لهم اني مبطل الدخاااان بس اللي براسة شي بيسوية
بقولها " اوووة نسيت اوراق مهمة في السيارة وبروح اجيبها بس دقيقة وراجع
" بطلع وامخمخ على ذيك السيجارة وبرجع
وبتفاجأ انها لين اللحين بفستانها ؟
طيب وبعدين ؟
بنقضي الليل وحنا مشخصين بثيابنا انا ببشتي وهي بفستانها
بفكر وافكر بطريقة المح فيها لها على انة خلاص
عاد يا الله بنقابل التلفزيون شوي وبعدها ببدا اتثاوب ( يعني فيني النوم ) ان كانها ذكية فهمت
بس احس ان زوجتي بتكون غبية فعلشان كذا فكرت بطريقة ثانية الا وهي بقول لها " ما ودك ننام "
على طووووول سؤال مباشر من خط الثمنطعش خخخخخ
بتتخربط البنت وبيقلب لون وجها لعدة اشكال وبا الاخير بتقول " تونا بدري خلنا نسولف " بعدها عاد تدرون الباقي